माघ २६ मा हुने विरोध प्रदर्शनका लागि एमालेको निर्देशन

काठमाडौ । नेकपा (एमाले) का अध्यक्ष तथा पूर्व प्रधानमन्त्री झलनाथ खनालले राष्ट्रिय सहमतिको बाटोमा एमाओवादी नेतृत्वको वर्तमान सरकार अवरोध बन्दै आएको र जारी दबाब आन्दोलनबाट पनि सहमति नभए मुलुकमा अशान्ति बढ्ने बताउनुभएको छ ।
यही माघ २६ गते काठमाडौँमा हुने विपक्षी दलहरुको विरोधसभाका सन्दर्भमा आज पार्टीको सम्पर्क विशेष समन्वय कमिटीद्वारा केन्द्रीय कार्यालय बल्खुमा डाकिएका अगुवा कार्यकर्ताहरुलाई निर्देशन दिँदै अध्यक्ष खनालले हेटौँडामा जारी आफ्नो सातौं महाधिवेशनबाट एकलौटी शासन र सर्वसत्तावादी सोच त्यागेर फर्कन एमाओवादीलाई आग्रह गर्नुभयो ।
उहाँले हाल मुलुकमा एमाओवादीले नेतृत्व गरेको गठबन्धन र नेकपा (एमाले) ले नेतृत्व गरिरहेको लोकतान्त्रिक शक्ति गरी दुईवटा मोर्चा कायम रहेको दाबी गर्दै दबाब आन्दोलनबाट पनि सहमतिमा नआए नचाहेर पनि मुलुक भिडन्ततर्फ उन्मुख हुनेछ भन्नुभयो ।
“त्यस्तो निर्णयका साथ एमाओवादी नआए आउँदा दिनमा त्यो पार्टी कहाँ छ भनेर नेपालीहरुले खोज्नुपर्ने हुनसक्छ”, उहाँले भन्नुभयो, “विपक्षीहरुको जारी आन्दोलनले एमाओवादीको जङ्गबहादुर शैलीको सर्वसत्तावादलाई पराजित गरेरै छाड्नेछ ।”
ताजा जनादेश र संयुक्त सरकार गठनका लागि सत्तारुढ गठबन्धनलाई सहमतिमा आउन बाध्य बनाउन आन्दोलन गरिरहेको बताउँदै अध्यक्ष खनालले सहमतिलाई एमाओवादीले नौटङ्कीका रुपमा लिइआएकाले अब कात्रो बाँधेर आन्दोलनमा उत्रनुको विकल्प नभएको बताउनुभयो ।
एमाओवादीको वर्तमान सरकारले मुलुकलाई संविधानविहीन बनाउँदै सबै क्षेत्रमा सङ्कट सिर्जना गरेर भ्रष्टाचार र अराजकता मच्चाएको आरोपसमेत उहाँले लगाउनुभयो ।
एमालेका सचिव शङ्कर पोखरेलले हाल देशका विभिन्न ठाउँमा विपक्षीहरुको विरोधसभामा जनताको उत्साजनक उपस्थिति देखिएको भन्दै माघ २६ गते एमालेको व्यवस्थापनमा काठमाडौँमा हुने संयुक्त विरोधसभा सफल बनाउन कार्यकर्ताहरुलाई आग्रह गर्नुभयो ।
एमालेका उपत्यका संयोजक कृष्णगोपाल श्रेष्ठले माघ २६ गतेको विरोध प्रदर्शनको तयारीका लागि २३, २४ र २५ गते सहरका सबै ठाउँमा प्रचारात्मक कार्यक्रम गरिने जानकारी दिनुभयो ।
सम्पर्क विशेष समन्वय कमिटीका प्रमुख गङ्गालाल तुलाधरले सरकारविरोधी आन्दोलनमा सबै पार्टी पङ्क्तिलाई परिचालन गरिने बताउनुभयो ।

– source freenepal.com