त्रिशूलीमा अझै फेला परेनन् दुई बस, नेपालले माज्ञो भारतसँग सहयोग

चितवनको नारायणगढ-मुग्लिन सडकखण्डको सिमलतालमा पहिरोले बगाएर त्रिशूली नदीमा खसेका दुई बस र अझै फेला नपरेका यात्रुहरूको खोजीका लागि नेपालले औपचारिक रूपमा भारतीय सहयोगका लागि पहल गरेको अधिकारीहरूले बताएका छन्।

गत साता त्रिशूली नदीमा खसेर हराइरहेका दुई बस र ती बसमा रहेका अधिकांश यात्रुको अवस्था अझै अज्ञात छ।

घटना भएको पाँच दिन बितिसक्दा पनि खोजी कार्यमा उल्लेख्य प्रगति हुन नसक्दा हराइरहेका यात्रुका आफन्तहरूले खोजी तथा उद्धारको प्रभावकारिताबारे प्रश्न उठाएका छन्।

केही विज्ञहरूले विपद्का यस्ता घटनामा गरिने खोजी र उद्धारमा नेपाली निकायहरूको विफलतालाई यो घटनाले उजागर गरिदिएको बताएका छन्।

चितवनका सहायक प्रमुख जिल्ला अधिकारी खिमानन्द भुसालका अनुसार त्रिशूली नदी (देवघाटभन्दा तल नारायणी नदी) मा खोजी कार्य जारी छ।

“हामीले सबै शक्ति र सामर्थ्य प्रयोग गरेर खोजी जारी राखेका छौँ। नयाँ उपकरण ल्याएर पनि खोजी भइरहेको छ,” उनले भने।

सोमवार साँझसम्म कुल १४ वटा शव फेला परेका थिए। तीमध्ये केहीको सनाखत हुन बाँकी भएको भुसालले बताए। त्यसमा तीन भारतीय नागरिक रहेको पुष्टि भएको छ।