आदिवासी जनजाति सभासदहरुको संघर्षमा ऐक्यवद्धताः जातीय स्वायत्तता र संघीयताका लागि संयुक्त गठबन्धनको राँके जुलुश

नेवाः काठमाडौं, मङ्सिर २, २०६८/

राष्ट्रिय स्वाधीनता, संघीयता तथा ऐतिहासिक पृष्ठभूमिको आधारमा आत्मनिर्णयको अधिकार र स्वशासनसहितको स्वायत्त राज्यहरु दाबी गर्ने उत्पीडित आदिवासी जनजाति सबैलाई सशक्त संघर्षमा रहन आह्वान गर्दै २०६८ मंसिर २ गते अपरान्ह काठमाण्डौंकौ सुन्धाराबाट रत्नपार्कसम्म आदिवासी जनजाति सम्बद्ध राजनीतिक सङ्गठनहरुको साझा मोर्चा जातीय स्वायत्तता र संघीयताका लागि संयुक्त गठबन्धनले  खबरदारी जनप्रदर्शन र मशाल जुलुश कार्यक्रम भव्य रुपमा सम्पन्न गरेको छ ।

सोही दिन दिउँसो नेपाल आदिवासी जनजाति महासंघलगायत विभिन्न राजनीतिक सङ्गठन र तिनका भातृसङगठन तथा जातीय सङ्गठनहरुले आदिवासी जनजाति सभासद सभा ‘ककस’ले कथित विशेषज्ञ समूह निर्माण गर्ने षडयन्त्रको विरुद्धमा गरेको सङर्घषमा समर्थन र ऐक्यवद्धता जनाउन संविधान सभा हल अगाडि धर्ना तथा जनदवाब कार्यक्रम गरेका थिए । यस कार्यक्रममा विभिन्न सङ्गठनहरुले ‘विशेषज्ञ समूह निर्माण गर्ने षडयन्त्र बन्द गर’; विशेषत्र समूह निर्माण गर्ने कार्य धोका हो, आदिवासी जनजाति सभासद हिम्मत गर, साथ दिन तयार छौं’ लगायताका नाराहरु लगाइएका थिए ।

आदिवासी जनजाति सम्बद्ध राजनीतिक दल तथा तिनका भातृसङ्गठनहरुको साझा गठबन्धन जातीय स्वायत्तता र संघीयताका लागि संयुक्त गठबन्धनले अपरान्ह काठमाडौंको सुन्धरामा जम्मा भई कोण सभा गरेर त्यहीबाट मसाल जुलुश गरी रत्नपार्कको शान्तिवाटिकामा पुगेर सम्पन्न गरेको थियो । मशाल जुलुश अघि र पछिको कोण सभामा संयुक्त गठनबन्धनका विभिन्न नेतृत्वहरुले आदिवासी जनजातिहरुको हक अधिकार, संविधान निर्माण प्रक्रिया तथा यसमा कथित् ठूला दलहरुको रवैयाबारे स्पष्ट पारेका थिए ।

राँके जुलुश अघिपछि गरिएको कोणसभालाई जातीय स्वायत्तता र संघीयताका लागि संयुक्त गठबन्धनमा आवद्ध राजनीतिक सङगठन राष्ट्रिय जनमुक्ति पार्टीका प्रतिनिधि; संघीय लोकतान्त्रिक राष्ट्रिय मञ्च महासचिव तथा मञ्च सम्बद्ध संघीय लिम्बुवान राज्य परिषदका प्रतिनिधि खगेन्द्र माखिम; आदिवासी-जातीय-क्षेत्रीय महासंघ, नेपालका प्रतिनिधि; ताम्सालिङ नेपाल राष्ट्रिय दलका अध्यक्ष परशुराम तामाङ; आदिवासी जनजाति महासंघ (समाजवादी) का अध्यक्ष रामसिंह लामा;अखिल नेपाल आदिवासी जनजाति महासंघ (एकीकृत) का अध्यक्ष नगेन्द्र र्राई; आदिवासी-जातीय-क्षेत्रीय महासंघ, नेपाल; नेपाः राष्ट्रिय पार्टी; जनमुक्ति पार्टी, नेपालका प्रतिनिधि नेतृत्वहरुले सम्बोधन गरेका थिए ।

जुलुशमा २०६८ मंसिर १४ गतेभित्र नयाँ संविधान जारी गर, संघीयता, जातीय स्वायत्तता र स्वशासन हुनैपर्छ; धर्मनिरपेक्षता लागू गर; संघीय लोकतान्त्रिक गणतन्त्र जिन्दावाद; राष्ट्रघाती बिप्पा सन्धि खारेज गर; सार्वभौमिकता र राष्ट्रिय स्वाधीनताको रक्षा गरौं; सम्पूर्ण आदिवासी जनजातिहरु एक होऔं; जातीय स्वायत्तता र संघीयताका लागि संयुक्त गठबन्धन, जिन्दावाद; विशेषज्ञ समूह निर्माण गरी आदिवासी जनजातिलाई धोका दिने षडयन्त्र बन्द गर लगायतका नाराहरु लगाइएको थियो । यस आन्दोलमा नेपाल आदिवासी जनजाति महासंघ र महिला महासंघको पनि ऐक्यवद्धता रहेको थियो । महासंघका अध्यक्ष राजकुमार लेखी र महिला महासंघका महासचिव सोनी लामाले ऐक्यवद्धता मन्तव्य व्यक्त गरेका थिए । कार्यक्रमलाई महासंघका पूर्व महासचिव प्रा. डा. ओम गुरुङले पनि सम्बोधन गरेका थिए ।

आदिवासी जनजाति सम्बद्ध राजनीतिक दल तथा तिनका भातृसङ्गठनहरु आवद्ध यस जातीय स्वायत्तता र संघीयताका लागि संयुक्त गठबन्धनमा नेपाः राष्ट्रिय पार्टी, संघीय लोकतान्त्रिक राष्ट्रिय मञ्च (मञ्च सम्बद्धसंघीय लिम्बुवान राज्य परिषद्…), राष्ट्रिय जनमुक्ति पार्टी, ताम्सालिङ-नेपाल राष्ट्रिय दल, जनमुक्ति पार्टी, नेपाल; आदिवासी-जातीय-क्षेत्रीय महासंघ, नेपाल; अखिल नेपाल आदिवासी जनजाति महासंघ (एकीकृत), र आदिवासी जनजाति महासंघ (समाजवादी) समाहित छन् ।

–  डीबी आङ्बुङ लिम्बू